【懷念家駒】葉世榮嘆Beyond難重組

20160721

• Tweet

東網電視

更多新聞短片

葉世榮好感慨咁話，佢每次每次三個人夾Band都會諗起家駒，感覺好難受。

Beyond鼓手葉世榮上月以發起人身份舉行了紀念黃家駒的慈善演唱會，演唱會共籌得240萬港元，其中100萬港元在演唱會前已捐給保良局，而今日世榮出席支票遞交儀式，把另外的140萬港元捐出，其中由保良局主席郭羅桂珍博士接受100萬港元支票善款，而福幼基金會副主席何麗全先生則接受40萬港元支票，兩人亦有送上禮物給世榮。

對善款感滿意

受訪時世榮表示對於240萬港元善款的成績感滿意：「係以家駒名義做慈善籌款，咁多年嚟籌得最多嘅一次，之前我都話想做個歷年最多善款、陣容最大、最精彩嘅關於家駒慈善籌款嘅演唱會，今次真係夢想成真，亦完成家駒其中一個慈善夢想。今日派成績表相當滿意，相信家駒在天之靈都會滿意。（黃家強知唔知呢個成績？）仲未講佢聽，我都係啱啱先返到香港，可能呢幾日會約佢飲茶，不過我都希望可以年年搞。（有相信出年會齊人開騷？）今次有個好好嘅成績，畀到佢哋睇我好認真做，希望嚟緊佢可以參與。」

望共同做公益

問到終極目標可是想齊人開騷？世榮表示：「當然最好，歌迷期待，其實重組唔簡單，記得03年我咃做Beyond tour，主辦方好煽情，放枝咪喺中間冇人唱，呢啲感覺好傷心，但如果我哋三個一齊做善事嘅感覺就會抹咗，甚至我係當家駒未走，一齊做公益活動。（重組最難係咩？）咁耐冇走埋一齊，大家都各自有自己嘅事業同發展，要擺低自己嘅工作投入Beyond工作係難，每次三個人夾Band都會諗起家駒，感覺好難受，不過如果三個做善事就唔會難受。（最難唔係拉家強同黃貫中一齊？）時間會沖淡一切，大家有共同目標做公益，可能佢哋關係會改善，可能咁多嘢就唔需要記喺心上。今次做咗漂亮示範，有呢個紀錄，希望每年都可以刷新紀錄。」

上一則

下一則

on.cc東網