家駒54歲生忌 葉世榮憶Beyond十年情

20160609

• Tweet

東網電視

更多新聞短片

葉世榮（上圖右二）暢談了Beyond成長之路及家駒的生前趣事。

明日是前Beyond已故主音黃家駒54歲生忌之日，由葉世榮出任發起人的《家駒….愛心延續慈善演唱會 2016》亦將於明晚舉行，viuTV更會於明晚全程直播。日前，世榮接受由鄧健泓、黃冠斌和彭詠儀的節目訪問，暢談了Beyond成長之路及家駒的生前趣事，期間，更即場表演用水樽及物品「打鼓」。

對家駒第一印象

世榮表示中學畢業後偶然透過友人介紹而結識家駒，他對家駒的第一個印象是健談、喜愛音樂、結他癡。兩人相識大半年，一日家駒致電邀請世榮加入其樂隊，他憶述：「當時家駒係第二結他手，但主音兼結他手幾霸道，經常指住家駒話『你個結他太大聲，擰細啲得唔得？』家駒就扭細聲啲，投入自己嘅世界去玩。後來家駒話主音要移民，我話不如你唱啦，佢一開聲，我就發現咁特別嘅，聲沙沙哋，帶啲磁性，同埋我哋當時好鍾意玩外國cover version，佢唱英文歌時神髓好似，唱到band嘅感覺出嚟，我哋就繼續玩落去。」

第一次Beyond演唱會

Beyond在83年成形後參加了多個獨立音樂會，84年並於堅道明愛中心舉行Beyond首個小型演唱會，世榮指演唱會的海報由他們一手一腳去設計和找印刷商：「當時貼海報有規矩，我就唔理亂咁貼，喺啲地盤度沿住圍板貼，畀我遮咗海報嗰個人梗係唔妥我，後來同佢傾，先知原來香港有貼海報呢個行業，我就話咁我唔貼畀你貼，睇你點計法啦，結果我哋不打不相識，仲成為朋友。」

家駒爭廁所輸家強

世榮表示最欣賞家駒有愛心，但亦坦言家駒亦有壞習慣，就是遲到，他說：「佢永遠最遲，我有問咩原因，因為當時佢同家強住，兩個起身爭廁所用，佢又唔夠家強快，到佢時佢又咪麼。除咗遲到，有時佢都囉唆，同佢討論問題佢太有見解，喺時間上嘅折磨下大家就會屈服。其實四人時期大家都有個依賴性，因為家駒好有主張，久而久之都係聽佢，所以都冇咩和事老角色。」

曾被稱搖滾叛徒

《再見理想》後，Beyond簽了Leslie Chan成經理人，基於唱片公司及市場需求，他們亦由創作地下音樂走向流行歌曲之路，因而一度被人稱為搖滾叛徒，世榮說：「我聽過，係有少少唔舒服，因為喺地下樂隊未出唱片時，玩任何音樂都係自己話事，但同唱片合作，佢哋要求嘅嘢唔同，佢希望你嘅唱片係能夠支持公司投資喺你身上，繼續幫你運作，呢個係啱嘅，所以好矛盾。」為了取得平衡，他們會寫大家易接受旋律，但編曲就用自己喜歡的方法，世榮說：「呢個真係work，88年我哋出《秘密警察》，仲有《大地》呢兩首歌，多咗好多人注意我哋，唱片當然比以前好啲，再接再厲下一張《真的愛你》，結果真係入到屋，之後《光輝歲月》、《Amani》都好受歡迎。」

三人時期最勤力

家駒93年意外離世後，世榮、黃貫中（Paul）和黃家強失去樂隊靈魂人物，無論感情和事業上都備受沉重打擊，世榮指三人非常迷茫，亦承受很大壓力，是人生中最痛苦的時候：「我哋曾經有段時間想放棄，但唔想辜負歌迷期望，所以硬着頭皮重新企番起身。」他指當時唱片公司希望Paul及家強間中擔任主唱的角色，而自己就可以繼續坐在後面打鼓：「佢兩個壓力好大，唱片公司又要求寫多啲歌、唱多啲好歌，呢種無形壓力令大家情緒緊張，我哋好努力發展三人Beyond，所以三人Beyond係最勤力嘅時候，每人要行多步。例如我打鼓，我搵多啲打鼓技巧去進步，寫多啲歌，甚至乎我都走咗去學唱歌，想幫助樂隊。」

上一則

下一則

on.cc東網